روٍآيتي..فـاقد الشي ما يعطيه..ردودكم وتشجيعكم=)

الهنوف استغربت ودخلت الصاله..


الهنوف:السلام عليكم..


ام خالد بصوت مخنوق:وعليكم السلام..


الهنوف باستغراب:وش صاير بعد؟؟


ام خالد خانقتها العبره:هذا اخوك فيصل يبي فلوس عشان يسافر..


الهنوف:فلوس..! ويسافر..! توه راجع ما شبع هذا؟؟


ام خالد:وش تقولين عاد لواحد همه دنيته..!


الهنوف:طيب لا يكون بتعطينه؟؟


ام خالد: ان ما عطيته يا بنتي بيقوم الدنيا ويقعدها وبيبرد حرته فيكم..!


انتي شفتي وش سوى في اختك ساره..ما تسوى..!


الهنوف:طيب خلي خالد يتصرف ما يصير كذا قاعدين على بنك حنا..!


ام خالد:لا كل شي الا خالد..!كفايه ان بينهم شرار خلقه تبينهم يتذابحون؟؟


الهنوف:خالد اكبر من كذا يقدر يقنعه بنفلس بسبب هالاخ..


ام خالد:ارتاحي خالد تكلم لين راح صوته وان قلت له ان فيصل ما اقتنع..


بيعصب ومحنا ناقصين بعد..


الهنوف تتنهد:الله يعينا عليه بس..ايه يمه عطي هذي الاوراق خالد اذا جا..


ام خالد تاخذ الملف: وش اقول له؟؟


الهنوف بعد ما قامت من الكنبه:قولي له يسوي نفس اللي قلت له هذاك اليوم وهو يعرف..


ام خالد تحطهم ع الطاوله:ان شاء الله..


مشت الهنوف بخطوات ثقيله ونست الموقف اللي كان شاغل بالها ومعلق قلبها..


وانشغلت باخوها وهموم الدنيا..


رغم ان هنوف هي واختها ساره تصرفاتهم استهبالهم..


يعطي غير عمرهم تماما..!


رغم كل اللي هم فيه عايشين الحياه بما فيها..


الا الهم يبعدونه مهما كلفهم الامر..


هي لحظات يكون اقوى من تحملهم لكن ما يدوم..


ومثل ما اعتادت هنوف تقول عشان تقوي نفسها هي واختها


((مصيره يضحك لنا القدر))


ويبتسمون..يضحكون..رغم الغصه المحبوسه..!


/


فاقد الشي ما يعطيه


/


وفي نفس هالوقت حمد اشغل نفسه بالتلفون يكلم خوي الدرب صقر..


باله مو مع صقر ولا يدري عن وش يتكلم حتى ..


لكن ما عرف شلون يهرب من الموقف اللي انحط فيه..


ومايبي مشاعره الغريبه تسيطر عليه..


لان حمد رغم حنانه ما يبين عليه..


ولا يحب يظهره بشكل ملحوظ واحيانا يضطر يخفيه..!


كره هذا الشعور اللي يصير له كل ماشافها..


او حتى تذكرها..والمصيبه انها كانت بين اياديه..!


بسبب شعرها الاسود حسبها ميساء..


وينصدم تطلع اللي شغلت باله هنوف..


صقر:هاه وش قلت؟؟


حمد:هااه..على ايش؟؟


صقر:لاااااا فيك شي مو طبيعي..


حمد تورط:وشو ولا شي..


صقر بضحكته اللي اخذها حمد منه:هع هع هع..اعترف لي احسن لك قسم تراي ما اعض..


حمد يضيع الموضوع:هع هع..الا تعض ونص..ما علينا لاتتاخر اليوم..


صقر:ايه هين تصرفها على بالك ما ادري انا..


حمد: ياليل النشبه..








يتبع

صقر:هع هع..ناشب لك لاخر ثانيه بحياتك..وبعدين من قال بتاخر..
حمد وهو يدخل البيت:طيب يالله اشوفك اليوم ان شاء الله..
صقر: ان شاء الله..فمان الله..
حمد:فمان الرحمن..
سكر الجوال ودخل للبيت..
دخل الصاله لقى الكل مجتمع..
حمد مبتسم بهدوء:السلااام عليكم..
الكل:وعليكم السلام..
حمد يناظر منيره:ايه نسيت لا ابارك لك مبرووك...
منيره :ماصار شي رسمي..ع العموم الله يبارك فيك..
حمد:لا شكلك متضايقه؟؟
ام حمد:ماعليك منها..وين ابوك؟؟
حمد وهو يستند ع الكنبه ويفتح قلاب ثوبه:مدري ماشفته..بس شكله مشغول..
لان فيه مشاكل صايره مع شركه منافسه..
ام حمد:بتقول لي وش يصير يعني..خلاص تبي غدا؟؟
حمد:ايه جوعااان..ليش ماراح تتغدون؟؟
ام حمد بعد ما قامت من الكنبه:لا ما دام ابوك ماراح يجي الحين بنروح للسوق..
عشان عزيمة اليوم..
حمد:ماله داعي هالشكليات كلها دلول جايه ماصار لها شهر بس في الرياض..
ام حمد:انت وش عرفك بهالاشياء خلك بشركه منافسه واسهم..
حمد:اجل لو غابت سنه وش بستوون...
ام حمد بسرعه:بسم الله عليها وش سنه انت..المسكينه رايحه هناك عشان زوجها..
انا مدري وش اللي بلانا فيهم..
حمد:الله..!يعني الحرمه ان راحت مع زوجها لاهله صارت مسكينه..!
هو المسكين اللي قاعد هنا عشانها..
ام حمد من المطبخ:وش قصتك اليوم بتصير محامي له؟؟ماتبي تتغدى الظاهر..
حمد:لا لا اسكت احسن لي اجل..
ميساء تطالع في الساعه كل خمس دقايق..
او بالاصح كل دقيقه..
تنتظر موعد دخوله عشان تروح تكلمه..
ام حمد جت من المطبخ ووراها الخدامه معها صحون الاكل تحطهم ع الطاوله..
ام حمد:يالله بنات البسوا عشان نروح يالله يمدينا نخلص اشغالنا قبل العزيمه..
الله يهدي ابوكم ماقال لي الا اليوم انه بسوي العشاء..
ميساء بسرعه:لا ما ابي اروح انا..
ام حمد باستغراب:ليش؟؟ماتبين تشترين لك شي مرتب ؟؟
ميساء:لا..عندي بدل واجد ما لبستهم..
ام حمد:كيفك..بس لا اسمعك تقولين لي ما عندي شي وما اعرف ايش ترى مافيه روحه..ما عندنا وقت..!
ميساء:ماراح اقول..ايه ترى انا عازمه هنوف واهلها عاد مدري اذا يجون والا لا
بس هنوف بتجي ان شاء الله..
حمد غص في اللقمه اللي كان ياكلها من اول ماسمع اسم هنوف..
لا وبتجي بعد مره ثانيه عقب اللي صار..!

حمد:كح كح كح..




يتبع

ام حمد:بسم الله وش فيك كل هذا جوع..اشرب ماي بسرعه..
حمد بعد ما ارتشف الماي قال لا شعوري:هنوف بتجي؟؟
الكل تنح والتفت لحمد وهبت لحظه صمت ع الجميع من سؤاله..!
حمد تورط وحس على نفسه وسؤاله اللي بوديه بداهيه:اقصد من هي هنوف؟؟
رجع الوضع طبيعي من بعد ما عدل اللي قاله..
ميساء:وحده معي من الجامعه..وساكنين جنبنا بعد..
حمد حاول يخفي اهتمامه بالاكل وسكت..
ميساء ناظرت بالساعه..
وقامت من الكنبه..
ام حمد:متاكده ماراح تروحين؟؟معقوله ماتبين ولا شي؟؟
ميساء تبي اشياء واجد لكن هذي الفرصه الوحيده اللي تقدر تكلمه فيها:ايه متاكده..
ام حمد:خلاص..قومي منيره البسي عباتك ويالله نمشي..
منيره قامت وصعدت مع ميساء..
كانوا ثنتينهم يمشون جنب بعض ع الدرج..
كل وحده منهم تعطي نظره غريبه اشبه بالانكسار..
ويحركون شفايفهم كانهم يجاهدون عشان يطلعون الكلمه الوحده..!
لكن للاسف الحاجز اقوى من أي شي..
واللي يرد منيره اكثر..ان ميساء تخفي عنها اشياء واجد..واولهم سر العقد اللي ماتعرف عنه ولا شي..
ودها لو تسال وتعرف وش قصته لكن كرامتها ماتسمح..!
وللاسف صار بين الاختين مسألة((كرامه!))
دخلت كل وحده منهم غر فتها..
ميساء سكرت الباب وراها وراحت للاب توب..
فتحته وتنهدت وتمنت تلقاه..
عشان ماتكون حارمه نفسها من الروحه معهم ع الفاضي..
ولانها ماتضمن تكلمه مره ثانيه..
فتحت ع المنتدى اللي هو يتواجد فيه قبل ما تفتح الماسنجر..
نزلت للمتواجدين وشافت اسمه بينهم..!
ابتسمت وفتحت الماسنجر..
دخلت..
وكلمها على طول..
واثقـ الخطوهـ:
يا هلا والله..
اطياف ذكرى:
اهلين..
واثقـ الخطوهـ:
شفيك عسى ماشر؟؟
اطياف ذكرى:
سلامتك مافيني شي..
ليش؟؟
واثقـ الخطوهـ:
الله يهديك خوفتيني عليك..
اطياف ذكرى:
هههه ليش وش سويت؟؟
واثقـ الخطوهـ:
ياجعل هالضحكه دوم..
لابس المنتدى وماعاد دخلتيه عقب اللي صار بيننا..
وحتى تواجدك قل في الماسنجر..
او مالي في الطيب نصيب..فمايصادف وقت دخولي دخولك..
واللي خوفني زياده عليك..
دقيتي ولا تكلمتي..
ليش؟
اطياف ذكرى:
دخولي للمنتدى او المسن..
بسبب مشاغل الدنيا انت عارف..
اما الجوال..
((وظلت فترة ماتكتب تورطت وش تبرر له موقفها))
يتبع

واثقـ الخطوهـ:



معك كملي..



((انتبهت وكتبت بسرعه))



اطياف ذكرى:



لا بس استحيت..



((ضغطت انتر وفتحت عيونها ع الاخر وشافت وش كتبت وضغطت على اسنانها وتندمت مليون مره..!انها كتبت هالكلمه وقالت اكيد بيفهمها غلط))



واثقـ الخطوهـ:



هذا وانا ماني عندك وكذا مستحيه..



اجل بكره ان شاء الله اذا جيتي ونورتي الشركه..



وش بتسوين..



معليه يالغاليه ..



شكل صوتي خرعك..



اطياف ذكرى:



مو كذا قصدي كنت اقصد ماني عارفه وش اقول لك..



لان اختي درت بالموضوع وانا ماني ناويه..



اعلمها الحين..



واثقـ الخطوهـ:



اووه معليه ياميساء..



لاتكونين زعلتي من كلامي؟؟



خلاص كنت امزح لكن وعد مانعيدها..



الهآم روحآني:



ميساء؟؟



من وين عرفت الاسم؟؟



واثقـ الخطوهـ:



ههههه



الله يصلحك ناسيه انك مرسله لي بياناتك..



الهآم روحآني:



اووه معليه اعذرني..



واثقـ الخطوهـ:



عاذرك..وبعدين اذا ما اعذرك اعذر مين؟؟



بس شكلك منتي على بعضك..



اذا فيك شي قولي؟؟



الهآم روحآني:



لا مافيني شي..



بس فيه شي واحد محيرني..



واثقـ الخطوهـ:



بس واحد..



تفضلي..



عيوني لك..



الهآم روحآني:



اول شي ممكن تخلي اللي بيننا رسمي..



تنسيني اللي ابي اقوله كذا..



واثقـ الخطوهـ:



هههههه



خلاص ولا يهمك ما اقول..



الهآم روحآني:



شلون نتقابل؟؟



يعني اقصد عشان التوظيف الرسمي؟؟



واثقـ الخطوهـ:



امممم..



شوفي اذا تبين انا بنفسي اجي لك واوصلك للشركه..



اطياف ذكرى:



لالا وش توصلني..



واثقـ الخطوهـ:



شفيك خايفه مني؟؟



اطياف ذكرى:



مافيه طريقه ثانيه طيب؟؟



واثقـ الخطوهـ:



خلاص وانا اخوك..



ولا تتضايقين مو مشكله..



لكن بغيت اسالك سؤال اذا مافيها مضايقه يعني؟



اطياف ذكرى:



تفضل..



واثقـ الخطوهـ:



عرفت من اسمك..



ان ابوك عنده شركه صح؟؟



اسمه مو غريب علي..







يتبع

اطياف ذكرى:


ايه..


لكن مايحق لي اشتغل فيها مهما سويت..


شايف كيف عند ابوي شركه كامله..!


وانا بنته ..


لكن اني اشتغل فيها هذا من رابع المستحيلات..


واثقـ الخطوهـ:


افآ ليش؟؟


اطياف ذكرى:


مالك بالطويله لكن صدقني لو كنت ضامنه..


او حتى في نسبه ضئيله اني ممكن في يوم من الايام..


اشتغل فيها ماكان عرفتك اصلا..


واثقـ الخطوهـ:


له له له..


وش هالكلام ياميساء؟؟


القصد مو كذا والله..


لكن انا استغربت بس وحبيت استفسر لا اكثر ولا اقل..


والسموحه ان حشرت انفي اليوم اكثر من اللزوم..


اطياف ذكرى:


مو مشكله حصل خير..


لكن ماكملت اللي كنت تقول؟؟


واثقـ الخطوهـ:


الحين عندنا اجتماع ضروري وانا تاخرت حيل عليه..


لنا لقاء ثاني اذا الله اراد..


الليل اذا قدرتي وفضيتي..


دقي علي ولاتخافين مو لازم تتكلمين..


او حتى تردين لكن بقول لك وبيوضح لك كل شي..


اطياف ذكرى:


يعني ماتقدر تقوله هنا؟؟


واثقـ الخطوهـ:


لا اقدر لكن مو الحين والكلام طويل حيل ويبي له شرح..


صعب شوي اكتبه لك..


واذا لهذي الدرجه خايفه مني مو مشكله ..


اطياف ذكرى:


لا ايش خايفه منك..


خلاص مو مشكله ادق عليك اليوم اذا فضينا من العزيمه..


واثقـ الخطوهـ:


ههههه


اطياف ذكرى:


على ايش تضحك؟؟


واثقـ الخطوهـ:


لا بس لاني كنت توني بقول لك..


لاتدقين الا بعد الـ12


لان بروح مع الوالد لعزيمه..


لواحد من السوق يعرفه بس مدري من..


اطياف ذكرى:


اووب بعد الثنعش واجد يمكن ما اقدر..


واثقـ الخطوهـ:


خلاص لعيونك..


اطلع بدري مو مشكله..


عند الـ11


ينفع؟؟


اطياف ذكرى:


امممم


خلاص طيب..


ينفع..


واثقـ الخطوهـ:


طيب يالاميره استاذن..


بروح لاجتماع..


اطياف ذكرى:


اميره؟؟


من هذي بعد؟؟


واثقـ الخطوهـ:


ههههه


ياحليلك اقصدك انتي..


يالله تامريني شي؟؟


اطياف ذكرى:


اووه معليش ما فهمتك..


لا سلامتك..


واثقـ الخطوهـ:


طيب يالله فمان الله..


اطياف ذكرى:



الله معك..








يتبع

..
سجلت خروجها من المسن..
وتنهدت براحه ماتدري ليش او حتى من وش ارتاحت..
رغم انها خبصت بالكلام وماسوت اللي ببالها بالضبط..
فتحت الدولاب تدور لها شي تلبسه للعشاء اليوم..
ميساء وهي تدور بين الملابس:اوووف..وانا اقول عندي..
وين عندي ياحسره كل شي لابسته..
وظلت تدور بين البدل ونست ناصر..
والشركه..وكل الدنيا وغاصت بالملابس..
/
فاقد الشي ما يعطيه
/
فارس وهو يتمدد على الكنبه اللي بصالة القصر بتعب..
حط شماغه ع الطاوله اللي جنبه..
وفتح قلاب الثوب..
دخل يده بشعره ونفضه وهز راسه..
وقعد يطق رقبته..
دق تلفونه..
فارس بصوت تعبان:الو..
مشعل:اهلين وش فيك ترد بدون نفس؟؟
فارس:مافيني شي بس تعباااااان توني جاي من اجتماعات ابوك اللي ما تخلص ابد..
مشعل:وانا اللي داق اشد الظهر فيك..ابيك تجي تخلص عني الاشغال..
فارس :لاااا..حبيبي انا ما صدقت افتك من مها..
مشعل:مها؟؟وش دخلها بالموضوع؟؟
فارس تورط طلعت غصب على لسانه:لا بس الشراكه اللي معهم ..وكل شوي رايحين لهم..
مشعل:اهاا..اجل خلاص اخليك ترتاح..
فارس:تسوي خير..
مشعل:يالله فمان الله..
فارس:مع السلامه..

سكر الجوال..




يتبع

وضغط على راسه وغمض عيونه بقوه يبي ينسى مها باي
طريقه يبي يشيلها من راسه مستغرب ليش كذا سيطرت على فكره..
واحتلت خياله..!
فارس بصوت عالي:مهاااا..مهاااا..مهااا..مهاااا..مهااا..!
دق جواله وهو يصرخ باسمها..وضاغط على راسه..
طالع بالجوال..
مها
يتصل بك..
فتح عيونه زين على باله من كثر ما قال اسمها قام يتخيلها..
رمش بعيونه اكثر من مره يبي يتاكد من اللي قدامه..
تذكر انه سجل رقمها من ملف المساهمين..
بس استغرب هي من وين جابت الرقم..او بالاصح ليش داقه الحين؟؟
رد بصوت مصدوم ومبحوح:هلا..
مها بصوت واثق ويجذب:اهليــن..
وتكمل بنفس النبرة:عرفتني؟؟
فارس بربكه:ايه..آنسه مها..
مها بضحكه خفيفه:ههه..باين عقدتك آنسه مها..وخلتك تكره السعوديات..
فارس استغرب انها مذكره الموقف الين الحين رد بصوت مهزوز:هههه..شدعوا..
ويكمل بربكه:موقف وحصل وعدى ولا تواخذينا عليه يآآنسه مها..
مها:اممم..ماسألتني ليش داقه عليك..
فارس:يعني اذا مادقيتي انا راح ادق..
حس على كلامه وحاول يضيع السالفه:بيننا شراكه والا نسيتي..
مها بثقه:لا مانسيت ..بس انا دقيت مو لهذا الموضوع..
فارس:عشان ايش اجل..
مها:طيب بشويش علي..
فارس ارتبك زياده:هههه معليش اسفين..تفضلي..
مها:بس حبيتا عزمك على حفله في شاليه..
فارس مصدوم وبعد فتره بسيطه رد:انــا..
مها بضحكه خفيفه:ههه اجل مين..
فارس:لا بس مستغرب شوي..ماقلتي لي بمناسبة ايش هذي الحفله..
مها:عيد ميلاد وحده اعرفها والحفله مختلطه وفيها ناس..من الطبقات العاليه..
وبيعجبك الجو يعني فحبيت اعزمك..
فارس باستغراب:اوكي من عيوني..ومتى؟
مها:امم يوم الخميس ان شاء الله..
فارس :طيب أي شاليهات..
مها:شالهيات الـمنصور..

فارس:ان شاء الله اشوف اذا كنت فاضي واقدر اعطيك خبر..




يتبع

مها:اوكي لاتضغط على نفسك اذا كنت مشغول..انا بس حبيت انك تغير جو..
فارس:تسلمين ومافيه ضغط ولا شي..
مها:يالله والمعذره ازعجتك معي..مع السلامه..
فارس:أي ازعاج بالعكس..الله معك..
سكر الجوال وظل متنح فيه دقايق..
مو مستوعب ان اللي دقت الحين هي نفسها مها اللي تخربط كيانه..
وتبعثر ثقته بنفسه..
وحس انها وحده ثانيه غير هذيك الشخصيه القويه..
الجديه اللي تربكه بحضورها..
ابتسم بخبث وقال:والله وطحتي يامها..حفله مختلطه هاه..
وبداية الغيث قطره..
افرغ نفسي واكنسل كل اشغالي بعد..
اخذ الجوال وحطه بجيبه واتجه لغرفته بعد التعب..
وفي راسه الف فكره وفكره..
/
فاقد الشي مايعطيه..
/
حمد متمدد بعد ما ملى بطنه بالاكل وشبع..
كان يفر بقنوات التلفزيون ومدد رجلينه ع الكنبه..
سرحان بفكره وخياله..
وبالهنوف..
اللي بين فكره وفكره لازم تدخل بالرغم ان الافكار ماتدور عنها..
لازم يشوف وجهها ويرن صوتها المرتجف في اذنه..
وخدودها اللي احمرت من الموقف..
وشعرها الاسود..
وكل تفاصيلها اللي صورها وحط نسخه لها في باله..
والظاهر هذي النسخة ابديه..
يقاطع موج الافكار هذا..
ميساء:ماااااااماااااا..
حمد:اعووذ بالله..باقي ماجت..لاتقولين تبين السوق..!
ميساء وهي لابسه فستان مخصر لونه وردي وعليه كرستال فضي يلمع على اطار صدرها ومفتوح لاخر ظهرها بس فيه شريطه بنص الظهر..
وواصل الى ركبها ولابسه كعب مرتفع شوي وخيوطه ملفوفه على ساقها:باقي ماجت..يووه بس كنت بوريها شكلي ..وش رايك حمد اجنن صح؟؟
حمد ظل مفهي ثواني وبعدها هز راسه:وش هالمصخره اللي لابستها بالله..تراها عزيمه بس..مو عرس..
ميساء مدت بوزها:ليش مو حلو يعني..
حمد:يستحسن تغيرينه..
ولف راسه للتلفزيون..
ميساء وهي ماده بوزها:انا من شفتك تقول يستحسن غسلت يدي منك..اووف
اذا جت مامي قول لي..
ومشت بخطواتها وكعبها اللي يدق في الارض..
حمد من غير ما يناظر: اروووح ملح على مامي هذي..ان شاء الله يصير خير..
دق جوالها قبل ماتصعد الدرج ووقفت ورجعت للصاله عند حمد..

ميساء:هلا وغلا بهنووفتي..






يتبع

حمد لف لميساء وميساء طالعت فيه بنظرة استغراب..
بعدها حس على نفسه ورجع يناظر بالتلفزيون وباله مع هنووف..
ميساء:ياقلبي عليك..تشرفونا..بس حسافه لو امك تجي كان عرفتها على امي..
هنوف:.....
ميساء:اوكي ياقلبي انتظرك..يالله باااي..
سكرت الجوال..
حمد:مين..
ميساء باستغراب:وانت وش دخلك..
حمد:لابس يعني استفسر..
ميساء:بسم الله عليك شكلك مثقل ع الغدا..قبل شوي يستحسن والحين استفسر..
فتح الباب ودخلت ام حمد ومنيره..
ام حمد:حط الاغراض عندك تجي الخدامه وتشيلهم..
منيره:اووف رجليني رجليني..حشا عذااب مو سوق..
ام حمد بعد ماعطت العبايه الخدامه:ميساااء..وش هالزين..
منيره بعد ماقعدت ع الكنبه وفصخت الكعب وببرود:ماكانك بالغتي شوي..
حمد:اقوول لها قبل شوي ماتسمع..
ام حمد:وانت وش دخلك ووش عرفك بشغل الحريم خلك على جنب بس..
منيره:ماعندك غيره..
ام حمد:منيــــره..اتركيها وش قاهركم يعني..
قمر قمر بسم الله عليها ربي يحرسها..ويحفظها..
وبعدين خلوها تتكشخ بيجون ناس واجد يمكن تنخطب بدل الخرابيط..
اللي براسها..
ميساء:مااماا..خلصنا وبعدين كيفي البس اللي ابي..
منيره:أي خرابيط يعني..
ميساء بسرعه:ولا شي ..
وتكمل مبتسمه:المهم عجب مامي..وترى خطبه وزواج مو الحين..
ام حمد:نعم ماسمعت..
ميساء بعد ماقامت وتعدل الفستان عند المرايه:ايه تو الناس..
منيره:بزر..انا طالعه اجهز اغراضي واتسبح..
ام حمد:ميساء بعدين نتكلم بهالموضوع..
ويالله سوي شعرك عشان بعد شوي بتجي دلال..
وبنصير مشغولين ولازم تخلصون شغلكم بدري..
انفتح الباب بشويش..
والكل لف عليه..
عضت شفايفها وابتسمت:السلام عليكم..
الكل بلهفه:وعليكم السلام..
ميساء ومنيره راحوا بسرعه لعندها وجوا بيضمونها بنفس الوقت..
وضموا بعض قبلها..
وهي ابعدت عنهم وظلت مبتسمه..
نهاية البارت الاول(الفصل الثالث)
قراءة ممتعه للجميع=)

البارت الثاني(الفصل الثالث)


وهي ابعدت عنهم وظلت مبتسمه..




منيره بعد ماطالعت وشافت ان اللي ضمتها ميساء:احم احم..


ميساء كانت مبتسمه ولما شافت منيره تلاشت الابتسامه:احم احم..


دلال فقعت ضحك:هههههههههه


ام حمد مبستمه بهدوء ع اشكالهم:ياهلين ببنتي دلوول..متى جيتي؟


حمد مبستم بسخريه على شكلهم:دلال تكفين سوي هالحركه دايم..الواحد مايحصل له يتشمت كل يوم عليهم..هع هع




دلال بعفويتها المعتاده:خلهم انا اللي بربيهم ..هههه


منيره بعصبيه:وبعدين خلصنا..!


وتكمل وهي تناظر لدلال:شالاخبار وحشتينااا يابنت..


ميساء من غير ماتناظر باحد بس نظرها ع دلال:


وحشتيني بجد هالشهر كانه سنه عندي..


دلال:يووووه بتقلبونه عزى انتم والا ايش؟؟


ترى كلها شهر بس ..


وتكمل وهي مبتسمه:وتعودوا علي غيباتي..


ام حمد وميساء ومنيره بسرعه:أيــــش..!


حمد فقع ضحك:هع هع..يازينكم بس وش فيكم ع البنت..


دلال:هههه..عادي زوجي واسافر معه ويمكن ما نطول هنا..


تقاطعها ام حمد:نعم نعم ماسمعت زين..وين ان شاء الله؟؟ وايش ماتطولين هنا؟؟




دلال:يمه جد يعني شفيكم قلت شي غلط انا؟؟..والا لهذي الدرجه مهمه احم احم..


ميساء:ايه مهمه ونص بعد..


دلال:هههه..لاجد فيكم شي مو طبيعي..


نجي للجد عاد يمكن بقعد عندكم في الدمام..


شهرين وبعدها بنسافر انا ووليد..


لدبي..


ام حمد:ليش؟؟


دلال:عنده دوره واكيد بروح معه يعني ببقى لحالي..


ميساء:ايه عادي وش فيها ظلي عندنا..


منيره:ايه جد خلك عندنا..


حمد:خلوا البنت تقعد بالاول..ترتاح المسكينه من اول ما فتحت الباب..


كلكم اكلتوها وبعدين يصير خير..


دلال:هههه..اخيرا فيه احد رحمني ورحم وليد اللي قاعد برى..


حمد قام من الكنبه بسرعه:يووووه نسيت الرجال..والله الفشله..!


الله يقطع سوالف الحريم..


وانتي توك تقولين..


اخذ شماغه بسرعه وطلع لمجلس الرجال اللي برى..


دلال وهي تفصخ العبايه وتعطيها الخدامه:اخذي شناط شوفيها برى..


وديها لغرفة فاضيه فوق..


ميساء بسرعه:دلوول نامي عندي غرفتي وسيعه وتكفي..


منيره:نعم لاحبيبتي لك لحالك هي..


دلال:خلاااااص خلصنا..لاعندك ولاعندها..بنام لحالي كذا احسن..


اخاف ماتخلوني انام الليل وانا دااايخه..


ام حمد:منيره..ميساء..وش اللي مقعدكم الحين هاه؟؟قومي انتي وياها سوو شعوركم..


ميساء:اوووف مو الحين ماشبعت من دلال..


ام حمد بعصبيه:ميساء تراك منتي بزر انتي سامعه..شكبرك وتتصرفين كذا..


اخلصي روحي سوي شعرك مافيه وقت..


دلع جدك خربك قومي اشوف..









يتبع

ميساء بمجرد ماقالت امها جدك تجمدت مكانها تنحت ثواني..
حست شريط حياتها يمر قدامها بهذي اللحظه..
كل ثانيه ارتمت فيها على صدره..
وكل لحظه ابتسم لها بحنان وهي تبكي..
ومسح دموعها وعطاها شي يلهيها..
كل مره تجي لعنده زعلانه من امها او ابوها..
كل مره تشكي له عن اختها منيره..
كل مره تقول وش صار لها..
مع فلان وعلان..
كل مره يواسيها ..
وفجأه من بد هالافكار كلها حادثة موته..
الشخص الوحيد في حياة ميساء..
كان الاب والام والاخت والاخ والجد..
في نفس الوقت عوضها عن حنان امها اللي تلاشى بوجود المال..
عوضها عن رعاية الاب اللي انصرفت للشغل..
كان يحس فيها انها طفله محتاجه قبل المال اسره..
لكن للاسف ميساء لما حملت فيها امها كان مثل ماقالت وقتها غلط..
وكانت متضايقه من الحمل..!
وقت افتتاح شركة ابو حمد وقت ما ام حمد شافت المال والعز..
رغم ان الشركه صغيره جداً..
لكن كان بالنسبه لها مجرد مازوجها امتلك شركه..
فهي شخصيه مهمه بالمجتمع..
فلما انولدت ميساء ما اخذت اهتمامهم او حتى شوي منه..
جدها احتواها يمكن الوقت اللي تقضيه معه..
اكثر من الوقت اللي تقضيه مع اهلها..
ولما كان طريح فراشه والكل عارف ان هذا هو مرض الموت..
الاسم اللي يردده على لسانه ميساء..
وكانت وصيته لابوها..
((ميساء بنتي لاتتركونها رددها يمكن عشر مرات
وكمل دموعها لاتنزل))
في هذي اللحظه دموع ميساء نزلت لما تذكرت جدها..!
وقفت جامده دقايق وهي تتذكره..
ولما وصلت عند موته نزلت دموعها..
الكل ظل متنح يناظر في ام حمد وميساء بنفس الوقت..
ام حمد اللي حطت يدها على فمها وتندمت انها جابت سيرته الحين..
والا ميساء اللي ظلت جامده بشكل خوفهم وفجأه نزلت دمعاتها بحراره ومن غير صوت..
ويحق لها تنزل دموع على شخص كان مصدر الحب عندها..
وهذا الشخص عند ميساء احتل مرتبه في قلبها ما احتلها احد قبله..
ولا بعده لحد الحين..
دلال تحاول تلطف الجو اللي تكهرب:احم احم..يالله منور ميسوو..
امشوا نتضبط فوق..
منيره بجمودوعيونها على ميساء اللي مازالت دموعها تنزل:
اوكي..يالله انا رايحه قبل مايجون المعازيم..
دلال قامت وبخطوات هاديه قربت من ميساء وحطت يدها على كتفها:
ميسوو يالله امشي..
وتكمل مبتسمه:عشان ابيك تضبطيني مو العزيمه عشاني..
بعد ثواني ميساء غمضت عيونها واخذت منديل ومسحت دموعها بسرعه..
وابتسمت بهدوء غريب لدلال:اوكي..

وقامت ومشت بخطوات مهزوزه لفوق ومرت من جنب ام حمد اللي منصدمه لحد الحين او بالاصح متندمه..



يتبع

ميساء لفت على ام حمد وناظرتها بنظره غريبه اول مره تشوفها ام حمد..
ولا قدرت تميز وش تبي بالضبط..
بعدها ميساء نزلت راسها ومشت لفوق..
ولحقتها دلال..
ام حمد قعدت ع الكنبه بتعب وتنهدت واسندت راسها بيدينها..
ام حمد وهي تنادي الخدامه:كاندرا..كاندرا..
الخدامه جايه مستعجله لها:نعم مدام..
ام حمد من غير ماتناظر:جيبي مويه وبنادول بسرعه..
وخلصتوا شغل والا باقي؟؟
الخدامه:باقي سوي بس مدام..
ام حمد:طيب خلاص روحي..
/
فاقد الشي مايعطيه
/
صوت يملا الغرفه من بعد ماكانت هاديه تماما..
يفتح عيونه بصعوبه يفركهم بتعب..
يتثااوب..
ويدور مصدر الصوت اللي قومه من نومه..
بعد فتره لما فتح عيونه زين شاف جواله فيه مكالمه لم يرد عليها..
مد يده واخذ الجوال وشاف الرقم غريب..
حط الجوال ورمى راسه ع المخده بيكمل نومته..
لما غمض عيونه دق الجوال مره ثانيه..
فارس:اوووف..وبعدين معك يعني..
طالع نفس الرقم الغريب اللي قبل شوي..
رد بدون اهتمام وبصوت واحد توه قايم من النوم:الوو..
الصوت بنعومه تأسر ورقه تجذب:هلا..
فارس فتح عيونه بقوه من بعد ماكانت شبه مغمضه وفركهم
وقعد وعدل جلسته:اهلين..مين معي؟؟
الصوت بنعوومه:امم ماعرفتني..طيب احزر مين انا..
فارس دق قلبه للصوت وطبيعي بسبب ميوعة المصدر:لا والله..بس قولي لي..

الصوت بدلع وزعل مصطنع:امم..يعني كذا ولاحتى تبي تحزر..
طيب تذكر مين اللي عطيتها الرقم..اليوم الظهر..
فارس تذكر انه كان يكلم وحده في الدردشه ورقمها وهو في العمل:يوووه..تذكرتك..
غريب دقيتي ماتوقعتك بتدقين..
يا..هاه بتقولين اسمك والا بعد صعب؟؟
الصوت:امم اسمي نادني ميشوو..
فارس:يالبيـــه..ياميشوو..اذا ما ادلعك ادلع مين..
مشاعل:شكلك توك قايم من النوم..معليش اذا ازعجتك..
فارس:ازعجيني حلالك انا كلي لك ..يكفي سمعت هالصوت اللي اتعبني..
مشاعل:هههه..الى هذي الدرجه..
فارس:ياجعلني افدى هالضحكه..قولي امين؟؟
مشاعل:امم..قول اول شي انا تعبتك لهذي الدرجه..؟
فارس:ياقلبي عليك تعبك راحه ..يكفي وراه هالصوت..
مشاعل بحيا:لا ما اقدر انا ذكا..
فارس:اموووت انا ع اللي تستحي..
يالبيـــه بس..



يتبع

مشاعل:طيب شعوولتي خلاص سمعت صوتي الحين وارتحت..


فارس:وين ياجعلني افدى كلمة شعولتي منك..بدري؟؟


مشاعل:لابس انت قلت لي بس اسمع صوتك وخلاص..


وامم والحين سمعته..


وبعدين توك قايم من النوم وانا ازعجتك..


فارس:ميشووو..


مشاعل:هلا..


فارس:ايش ازعجتيني هذي..لاعاد تقولينها مره ثانيه سامعه..


يكفي هالصوت اللي يداعب سمعي..


خله يزعجني مره ومرتين ومليووون حلاله..


مشاعل بحيا:خلاص بس بسكر..


فارس:اجعل بزعل انا..


مشاعل:لا ايش تزعل..بس انت قلت لي كذا..


فارس:مجنووون..لاني كنت مجنوون والا انا الحين ادمنت هالصوت..


مشاعل:بسم الله عليك..ياقلبي..


فارس:لااااا..فيها قلبي بعد دقيتي والحين قلبي..


وتقولين تسكرين منتي مسكره سولفي قولي أي شي..


اخ بس على هالصوت اللي يدووخ..


مشاعل:ايه قلبي وروحي بعد..


فارس:ياويل حالي..ووش بعد؟؟


مشاعل:....


فارس:وينك..معي ؟؟


اموووت انا ع اللي تستحي ياناااس..


مشاعل:....

فارس بصوت يجذب:ميشووو..



مشاعل بصوت واطي ومستحي:عيونها..


فارس:يالبيييييييييه..ياجعلني افدى عيونها..


مشاعل:احم احم..


فارس:صحه ياقلبي..متى اشوف اللي ورى هالصوت..


مشاعل:امم ليش..


فارس:ايش اللي ليش ياقلبي لازم..


مشاعل:يعني تبي تقابلني..والا صوره ؟؟


فارس:ياروحي انتي دامك عندي هنا اقابلك..


وقبل ماتتكلم:ولاتخافين في مكان عام اللي انتي تختارينه ..


مشاعل:امم مدري شعوولتي..اشوف..


فارس:يارووح شعولتي..لازم ماتبين تشوفني..


ماتبين ادللك..


مشاعل:شعوول..قلت لك ماني من هالنوع..


فارس:لالا..لاتفهميني غلط ياقلبي..انا غير عن الشباب..


ماني مثل ماتظنين واكبر دليل اقول لك مكان عام قدام الناس كلهم..


وانتي اللي تختارينه بعد..


ويكمل بصوت يقنع ويجذب:وبعدين ياروح شعوول وعيونه..


ادري انك غير ومنتي مثل أي احد..

مشاعل:احم احم..طيب بسكر الحين ياقلبي انت..



فارس:ياويل حالي..سكري بس بشويش..


خليني اسمع انفاسك لاخر ثانيه..



مشاعل بحيا:يالله فمان الله شعولتي..



فارس:الله معك ياقلبي..انتبهي لنفسك..



سكر الجوال بعد ما ي سكرت..



فارس وهو يقوم من السرير:ههههههههه



جد عقلها صغير..بكم كلمه وجبت راسها..



قال شعولتي قال..طيب ياللي مو من هذا النوع نخليك منهم..



مو مشكله..



مافيه بنت تصعب عليك يافارس..



مجرد مانطق هالجمله الاخيره..



صوت مها وصورة مها مرت قدامه..



وجمدته مكانه قبل مايدخل الحمام..






يتبع

حس بعجز غريب وشعور يمشي بعروقه..
ضغط على اسنانه وضغط على يدينه..
تنهد ورجف جسمه ..
بعدها حاول يبعد هيبة هالبنت من قدامه بهاللحظه..
يبي يحس بلذة الانتصار على مشاعل..
يبي يحس بتملكه ع اللي حوله..
بسيطرته ع الجنس الناعم..
بهيبته كرجل..
وينسى ربكته بحضور مها..
غسل وجهه بمويه باارده..
وغمض عيونه..
نسى صوت مشاعل اللي داعب سمعه قبل شوي..
وانصياعها له بكل سهوله رغم رفضها له بالبدايه..
وحلت محلها اللي تبعثر كيانه مها..
اخذ له دش يحاول يغسل ولو شوي من سيطرة مها..
/
فاقد الشي مايعطيه
/
منيره:لاصدقيني كذا يطلع احلى عليك..بس انتي تعودتي شعرك سترايت..
وماتبين تغيرينه..
دلال وهي تناظر بالمرايه:امم..مدري يابنت حاسه شكلي غلط..
منيره:غلط..!بسم الله عليك تجننين وبعدين هذي مناسبه راقيه..
تعودي كذا تسوين شعرك..
دلال:خلاص كذا احلى كذا احلى ..نمشي على شورك وش ورانا..
وذنبي برقبتك اذا احد حش فيني والا تطنز..
منيره:ههههه..الله يقطع ابليسك..من قال فيه احد بيتطنز اصلا..
خلاص مو انتي تقولين على شوري اجل تطمني..
ميساء تفتح الباب بهدوء وهي لابسه فستانها ومسويه بف وشعرها سترايت
ما عدا الخصلتين اللي قدام بس موجتهم شوي..
وحطت ورده ع اليمين بنفس لون الفستان..
والميك اب كان ناعم حيل وحطت حمره لونها وردي قوي شوي مبرز شفايفها..
ميساء بهدوء غريب عليها:دلول وريني عطوراتك اللي عندك..
دلال وهي تطالعه فيها من فوق لتحت:ماشاء الله تبارك الله..وش هالزين ياختي..
تطيحين الطير من السماء..
منيره وهي تجمع المكياج وتحطه بالشنطه:يالله دلال تبين شي بروح
ادور النعال اللي اشتريتها اليوم ومدري وين راحت..
دلال وعي تطلع عطر:لا سلامتك..بس هاه لاتتكشخين واجد وتسلبون

الاضواء مني انتي واختك..لاتنسون العزيمه عشاني ههههه
منيره وهي طالعه:ههههه..لا لاتخافين
وتكمل وهي تناظر لميساء:ماراح اكشخ لهذي الدرجه..
ميساء بعد ماتعطرت:يالله نازله تحت..
وطلعت بسرعه قبل منيره حتى..
دلال:منيره وش هالكلام وبعدين انا امزح بلطف الجو
وانتي تزيدين الطين بله..يكفي كلام امي..واتركي حركات البزران هذي
تراكم كبار..
منيره وهي ماسكه الباب:دلول ماقلت شي غلط انا..وانتي بنفسك قلتي يكفي كلام امي..
اذا هي زعلانه فتأكدي مو مني..ع العموم انا رايحه لاتدري امي اني
باقي ماخلصت..وتعصب..
دلال بعد ماطلعت منيره وهي تناظر بالمرايه وتتنهد:الله يرحمك ياجدي..

كنت الوحيد اللي تقدّر..


يتبع

.............
وفي نفس هذا الوقت لكن بالدور اللي تحت وعند جهة الرجال..
ابو حمد وهو يتبخر:هاه ماجا احد..
حمد وهو قاعد يلعب بلوت هو وصقر ووليد:لا يبه ماجا احد تو الناس
الحين المغرب ما اظنهم يجون الحين..يمكن بعد العشاء..
ابو حمد:وانتم لين الحين تلعبون..
صقر وهو يطق ركبة حمد وبصوت واطي:اقوول..ابوك شوي ويتوطى ببطونا..
قوم من اللعب احسن من العصر وحنا نلعب..
حمد:سم يبه قايمين الحين..يالله شباب عن اذنكم اروح ابدل..وليد
ماتبي شي من هنا والا هنا..
وليد:لاسلامتك انا جاهز..
صقر:وانا اسالني ع الاقل..
حمد:هههههه..مو وقتك خلك على جنب الحين..
وليد:ههههه
صقر:على جنب على جنب مو مشكله..
ويكمل وهو يضحك:متعووودييين..
...
ابو حمد:لا ولدك يلعب بلوت مع الشباب ناسي نفسه الاخ ..
ام حمد وهي توجه الخدامه وين تضبط الطاولات:وانت ليش ماكلمته طيب..
ابو حمد:كلمته ومن قال لك ما كلمته..بس ولدك هذا مايركز..
حمد مر على هذي الكلمه وقف ثواني:السلام عليكم..
ويكمل وهو يبتسم بضيق:نسيت الجوال هنا..
ام حمد بدون اهتمام:اهـ..شفه ع الطاوله..
اخذه وصعد لغرفته فوق وسكر بابها وتنهد..
غمض عيونه بألم يحاول يتذكر ماضي يسعده..
او حتى كلمات تداويه تنسيه..
لكن بدل مايتذكر الماضي صورة هنوف جت على باله..
صوتها رن في اذنه..
ابتسم رغم انه كان يبي ماضي طلع له الحاضر..
حمد:هنوووف..ابيك ياهنووف..
دخل الحمام وسكره..
..
سيارات اصطفت قدام البيت ناس طالعه وناس داخله..
ام حمد وهي تسلم على اللي يدخلون:ياهلين وسهلين نورتونا..
تفضلوا تفضلوا..ميساء واقفه بهدوء مجرد ابتسامات للي تسلم عليهم..
واللي ثلاث ارباعهم يتنحون فيها ويتمقلون من فوق لتحت..
منيره كان لبسها ابسط من اختها..
تنوره قصيره لتحت الركبه لونها اسود وفيها كسرات عريضه..
وحزام فوشي على خصرها..
وبلوزتها كانت فوشي نازله عن كتوفها..
وممسكوه من عند كمومها وخصرها ..
ولابسه كعب اسود مو عالي حيل..
وشعرها كانت رافعته كله وحاطه طوق فوشي ناعم..
وماكانت مكثره ميك اب..
كانت تبتسم بعفويه للي يسلمون وترد عليهم..

بتواضع وهدوء..


يتبع

لكن كان واضح انها مالفتت الانظار مثل ميساء..


اما دلال اللي العزيمه مسواه عشانها..


كانت لابسه فستان ابيض ممسوك من تحت الصدر..


بحزام سماوي عريض..


عليه غليتر..والفستان كان ستان وفوقه شيفون..


ومفتوح من ظهرها كان انيق وهادئ..


وشعرها كانت مسويته بف ومموجته..


وحاطه ورده ناعمه على جنب بلون سماوي..


مكياجها كان قوي شوي..


ومبرز وجهها بطريقه حلوه..


كانت تسلم عليهم بثقه وترد وتاخذ وتعطي مع المعازيم..


بحكم انها متزوجه كانت متعوده على هذي الشكليات..


وامتلت الصاله بالمعازيم انواع اشكال..


وثلاث ارباعهم مو معروفين مجرد انهم عائلات راقيه بس..


ميساء بعد ماسلمت ع الكم الهائل اللي سبب زحمه وازعاج مو طبيعي..


جلست تبي ترتاح ع الكنبه هذا بعد مادورت مكان طبعا..


عيونها كانت تدور هنوف اللي وعدتها انها بتجي..


هي واختها ساره..


لكن لحد الحين ماشافتها..


ميساء ماتحب هالرسميات وخصوصا انها تذكرها بحلمها وامنيتها..


ياللي هي الشركه اللي ابوها رافض تماما انها تشتغل فيها..


ميساء بعد ماقعدت جنبها منيره:اووف..ماجت هنوف لحد الحين..


منيره من غير ماتناظر:هنوف..مين هنوف؟؟


ميساء:لا..بس وحده اعرفها عزمتها..وقالت بتجي بس ما اشوفها..


منيره بدون اهتمام:اهاا..


منيره وهي تشبك اصابعها بربكه واضحه وعيونها على وحده قاعده..


في اخر الصاله..


ميساء لاحظت ربكتها:شفيك؟؟


منيره:هاه..لا ولاشي..


ميساء متعوده قالت بدون اهتمام:طيب..


منيره كانت بس تبي تتكلم لاي شخص حتى لو ميساء:لابس هذولي اللي


بيخطبوني هذي امه والثنتين اللي جنبها خواته..


ميساء استغربت من كلام منيره:اهاا..


ميساء كانت بتجاريها وتكمل لكن كالعاده في شي صدها..


نطقت بصوت واطي:يعني مستحيه..


منيره:ايش..


ميساء:لابس كنت اقول مستحيه يعني والا ايش..


منيره:لا مو كذا بس..يعني تعرفين اكيد الحين يراقبون تصرفاتي..


يعني تعرفين بعد..


ميساء:اهاا فهمتك..


وتكمل وهي تبتسم بهدوء:عادي يحق لك اكيد ترتبكين..


ام حمد تأشر لمنيره تجي عندهم..


منيره وهي تمسك يد ميساء بقوه:يووه امي تناديني شسوي..


ميساء استغربت تصرفاتها بس قالت اكيد عشانها محتاجه بس:عادي روحي..


ماعليك تشجعي..


منيره وهي تقوم من الكنبه وتعدل التنوره تنهدت وراحت لهم لكن عيون الام كانت على ميساء..


اللي تجذب النظر بلبسها..


وانوثتها البارزه..


دلال كانت لاهيه مع المعازيم والسوالف ومنيره راحت عند اهل اللي بيخطبها..


وام حمد رايحه جايه كل شوي..


ميساء عيونها ع الباب تنتظر متى تدخل هنوف وتفكها..


لكن قالت شكلها بتطول..






يتبع

بتروح تنتظرها برى..


اخذت جوالها عشان لودقت..


وقامت واتجهت للباب بخطواتها والكل عينه عليها..


طلعت وسكرت الباب وراها:اووف..وش هالخنقه يالله يازين الهدوء..


وينك ياهنووف..


تطالع في ساعتها وترفع راسها للباب..


مشت وابعدت عن الصاله شوي وصوت كعبها كان واضح..


قعدت على كرسي بالحديقه..


يبعد شوي عن باب الشارع لكن تقدر تشوفها اذا دخلت..


طلع شخص من باب مجلس الرجال اللي وراها..


دق تلفون ميساء..


التفت الشخص لمصدر الصوت لقاها قدامه قاعده..


ميساء ماكانت تشوفه لانها معطيته ظهرها ولما دق جوالها..


شافت الرقم لقته رقم ناصر(واثق الخطوه)


استغربت انه داق الحين وهو قايل لها ع الـ12


ولما تخلص العزيمه..


ماكانت تبي ترد وبعدها غيرت رايها قالت الحين فاضيه وش وراها..


ميساء بصوات واطي وواثق:الوو..


استغربت لانها كانها سمعت صدى صوتها وراها..


ميساء:الوو..؟


سمعت ضحكه غريبه عليها من ورى..


دق قلبها وخافت حست ان فيه شي غلط..


التفتت بسرعه وراها تبي تعرف مصدر الضحكه من وين..


شافت قدامها شاب ماسك الجوال ويطالع بابتسامه غريبه ماقدرت تميزها..


رجع ضحك باستهزاء ونزل راسه..


وابتسم ومسك دقنه بيده..


ميساء ظلت متنحه مو مستوعبه اللي صاير..


ومي عارفه تقوم والا تظل والا تنتظره يروح..


مع ا ن مو باين عليه انه بيتحرك..


ميساء بعد فتره: احم احم


نزلت راسها بالارض ورجلينها تسمرت مو قادره تتحرك..


لانه طول الوقت كان يناظرها بنظرات ماقدرت تفهمها..


نفسها ازداد وصدرها قام يطلع وينزل..


تمنت انها ظلت داخل ارحم لها مليون مره ..


ونست ناصر اللي داق عليها مازال ع الخط..


بابتسامه وعيونه عليها:ماعرفتيني؟؟


/


فاقد الشي ما يعطيه..


/


مشعل:ماشاء الله ..والعزيمه هذي من ضمن الشغل والا ايش..


فارس وهو ياخذ من البوب كورن(الفشار) اللي قدامه:ابد تغيير جو على قولتها..


مشعل من غير مايناظر عيونه ع الجريده:تغيير طيب..ابوي يدري..


فارس وفي فمه الفشار:هههه..


كمل اكله وقال:وش دخل ابوي بالسالفه..


مشعل بدون اهتمام:ليش العزيمه من بيروح لها..


فارس:انت منت متعود على هذي الطلعات..


هذي العزيمه او الحفله بالاصح..جمعه شباب وبنات..يعني فله ووناسه..


ولاحظ ماقلت شياب..


مشعل ينزل الجريده ع الطاوله اللي قدامه:فارس حسن الفاظك شوي..



ويكمل كلامه:يعني بمعنى كلامك مختلطه..



وهنا بالسعوديه..



فارس:هههه..مشعل شفيك واذا بالسعوديه انت مغمض عيونك..



عن اشياء وااجد خلك بالاسهم اذا طاحت والا باقي..



ويلتفت للتلفزيون ويكمل اكل..




يتبع

مشعل يبتسم بثقه:لابسم الله عليك مفتح وع الاخر بعد..
ودليل اني مفتحهم..داري بموضوع المليون..
فارس غص باللقمه اللي كان ماكلها..
فارس:كح كح كح..
مشعل بهدوء:صحه..اشرب من العصير اللي قدامك..
ايه اصبر خلني اكمل..وادري عن الحفلات المشبوهه..
يعني بالله يافارس واحد مكاني ومايدري..
فارس بعد ماشرب من العصير واخذ نفس وتماسك ربكته:يعني قلت شي جديد..
واذا..
دق جوال مشعل قبل مايتكلم..
اخذه ورد:هلا..
فارس تنهد وحمد ربه ان الجوال دق الحين وقطع الكلام..
اللي كان ممكن يودي فارس بداهيه لو وصل لابوه ودرى عن الاختلاسات..
سحب نفسه بهدوء ومشعل لاهي بالكلام..
وطلع من الصاله بكبرها والقصر..
يبي يروح يغير جو..
او بالاصح يخلص نفسه من مشعل..
/
فاقد الشي مايعطيه..
/
ساره وهي تلعب بشنطتها السودا الصغيره:امم..مدري هنوف احس شكلنا غلط..
هنوف وهي تلبس العبايه قدام المرايه:غلط؟؟وليش ان شاء الله..
ساره:يعني انتي عارفه طبقتهم..وعارفه الناس اللي بيجون لهم..
والمشكله حنا مانعرفهم..او بالاصح انتي ماتعرفين ميساء الا هذي السنه..
وماكد شافوك والحين توك تجينهم..
هنوف:اقوول..لاتبدين حركاتك البايخه..قال طبقتهم قال..
يعني وش يزيدون عنا فيه..الفرق عندهم شركه ملكهم هم..
ومو من كبرها بعد..وبعدين عادي مايهم شافوني والا لا..
ساره وهي تتغطى:مدري حاسه نفسي متوتره حيل..كأني اول مره اروح عزيمه..
يمكن عشان امي مو معنا..
هنوف:ههههه..قولي من الاول انك متوتره عشان كذا كل هالتخريف..
ساره:هنوووف..عطيني وجه شوي..
هنوف:امشي بس تاخرنا حيل..الحين ميساء بتذبحني..وخلينا نمر على امي..

نسلم عليها مسكينه بتظل هنا وحنا بنروح نتونس..
ساره:طيب مو حنا اللي منعناها تجي..
هنوف:يعني كأنك ماتدرين..هي فاضيه لهذي العزايم بالله..
وبعدين تخاف لو جا اخوك وماشاف احد بالبيت..وهو اصلا يدور سالفه..
ساره وهي تنزل للصاله:يوووه..تكفين هنوف لاتجيبين سيرته الحين..
مالي خلق له ابدا..خلينا ننسى الدنيا ولو شوي ع الاقل..
هنوف:هههه..تستاهلين عشان تعرفين تفسلفين علي..
ام خالد لما مروا من عندها:هاه خلصتوا..بس كأنكم تاخرتوا شوي والا هي قالت لكم كذا..
هنوف بعد ماباست راسها:لا شوي تأخرنا..
ساره:هاه ماما تامرينا على شي..
ام خالد:سلامتكم ياقلبي..

وتكمل وهي تتنهد:اهم شي استانسوا وغيروا جو..


يتبع

هنوف:اكيد..بس لاتخافين ماراح نتأخر عليك..
ساره:ههههه..
ام خالد:ههههه..يالله الله معكم..
مشوا وطلعوا برى..
ووصلوا لبيت ميساء اللي قريب من عندهم..
طقوا الجرس..
......
وفي نفس هذا الوقت..
بابتسامه وعيونه عليها:ماعرفتيني؟؟
ميساء كانت تاخذ نفس بشكل سريع ودقات قلبها متلخبطه..
نظراته نبرة صوته ثقته الغريبه..
والموقف اللي انحطت فيه..
كلهم كانوا بوجهها وهي ماعرفت تتصرف..
شفاتها تجمدت مكانها ماقدرت تحركهم اصلا..
يمكن بسبب عيونه اللي كانت موجهه لها بالضبط..
او ابتاسمته اللي تجذب..
او حتى سؤاله الغريب..
حاولت تنطق تقول لو كلمه..
تخلص نفسها منه..
او تهرب بالرغم من ان رجلينها ماتساعد..
بعد فتره بسيطه..
كمل هو:طيب عشان تعرفيني حطي السماعه باذنك..
زادت نبضات قلبها اكثر واكثر..
ارتجفت من الربكه..
مافكرت وش قصده لكن كلامه كان يربكها..
رن الجرس..
وهي كانها شافت الفرج قدامها ماتدري من وين جتها الشجاعه الحين..
لكن يمكن عشانها لقت عذر يقومها..
قامت مسرعه وابعدت عنه للباب..
فتحت الباب واخذت نفس عميق..
ابتسم هو من بعيد..
وتنهد ولف لجهة المجلس ودخل لداخل..
هنوف وساره دخلوا..
هنوف:اوه ميسو تفتح لنا من قدنا..
سلمت عليها وميساء ماكانت يمها..
جت الخدامه كانت تبي تفتح الباب..
ميساء:خلاص روحي..
دقيقه مدام وين؟؟
كاندرا:فيه مجلس مع حريم..
ميساء:طيب..
ساره سلمت عليها..
هنوف:هذي سارونه اختي..
ميساء وش فيك؟؟
ميساء:هاه..لا ولاشي..
هنوف:ولا شي هاه..اكيد؟؟
نهاية (الفصل الثالث)
قراءة ممتعه للجميع=)

البارت الاول(الفصل الرابع)
"فوران..هيجان..لم اميز لكنه مؤلم..!حنون..كل ما استطيع قوله محب للنكران..
هو ذلك العشق المجنون..!"
هذي كلمات مرت قدام عيون ميساء..رنت في اذونها دفعت الدم بشرايينها..
كانت حروف خطها قلمها كانت مقطع من الخاطره..
او يمكن بتكون حياتها من اليوم ورايح..
بتكون اجزاء حياتها في صفحه بيضاء..كانت بتقدمها لاختها وانقلبت..
شي ثاني ماكان له أي حساب ابدا..
ميساء بابتسامه تعجز العقول عن استيعابها:اكيد..امشي خلينا ندخل بدل الوقفه..
ع الباب..
هنوف مستغربه:اوكي..يالله..
مشوا ودخلوا لداخل الصاله وميساء صامته بشكل غريب..
كانت الصاله مزحومه..والاصوات ترن فيها..
والكل لاهي ومنشغل ومنيره كانت قاعده عند اهل اللي بيخطبها..
ومنحرجه ومنزله راسها..
وام حمد قاعده معهم تسولف مع امه..
دلال كانت قاعده بجهه ثانيه من الصاله..
وتسولف مع اللي بعمرها..
باختصار كان الكل لاهي بشغله ..
ميساء من غير ماتناظر:امشي هنوف ساره..اوديكم لامي..
مشوا وراها متجهين للجهه اللي قاعده فيها ام حمد..
ميساء وهي منزله راسها عشان تقدر تسمعها امها:ماما..هذي هنوف زميلتي بالجامعه اللي قلت لك عنها..
ام حمد من غير ماتناظر:اوكي ميساء ثواني بس..
وكملت احاديث الفشخره مع حرمة عمهم سعود..
واهل اللي بيخطب منيره..
ميساء ضغطت على اسنانها واخذت نفس وانحرجت من هنوف واختها..
ميساء تضيع الموقف:امشوا اوريكم دلول..
مشوا وراها منصاعين..

ميساء:دلوول..
دلال تلتفت لها:عيونها..
ميساء:هذي هنوف واختها ساره..اعرف هنوف من الجامعه..
وهم جيراننا بعد..
دلال وقفت تسلم وبابتسامه طلقه:اهليــــن..
سلمت عليهم..
دلال:حياكم تفضلوا اجلسوا معنا..
ميساء:لا معليش بنقعد بعيد عن الازعاج..
دلال باستغراب:اوكي براحتك..
ميساء:امشوا ناخذ نفس بالصاله اللي داخل..
هنوف:ميسوو..
ميساء:هلا..
هنوف:فيك شي غريب..لاتخبين علي حتى لما فتحتي الباب..
باين عليك مرتبكه او شي كذا..
ساره:ايه..اكيد تحب..
ميساء بسرعه:لا ايش احب..
هنوف وساره:هههههههههههه

ميساء قعدت ع الكنبه ومنحرجه نزلت راسها:وش فيكم..



يتبع

هنوف وهي تضحك:ياختي عليك لما يطقك الحيا..
ساره:ههههه
ميساء:يوووه..وبعدين معكم يعني..
ساره:يازينها خويتك هذي..
هنوف تضربها: وشو هذي تأدبي..
اسمها وتكمل بخبث:ميسوووو..
ساره تكتم ضحكتها:طيب..ميسوو..
ميساء وهي تضرب برجلها الارض:اووف..خلصنا..
ساره:يازينها حتى اذا عصبت تهبل..
هنوف:خلاص سارونه لاتخلينها تكرهك..هههه..
ميساء بخجل:لاشدعوا اكرهها..
وتكمل بضيق:بالعكس انتي واختك ماتعرفون قد ايش معزتكم..
هنووف:ياهوووه..خلاص قلبناها شي ثاني والناس فالتها ومستانسه..
ساره وهي تحط يدها على كتف ميساء:معليك حنا بوقت الحاجه موجودين..
وتكمل وهي مبتسمه:بس لا تاخذين راحتك ههههه
هنوف تضربها:بنت اعقلي لاتقول وش هالهمج اللي ابتلت فيهم..
ميساء بخجل:ههههه
هنوف:ساره ماودك تروحين تتعرفين ع البنات اللي هناك..
كأنك تعرفينهم..
ساره وتناظرها من طرف عين:يابنت حتى تصريف ماتعرفين بالله كيف تجي تتعرفين وكانك تعرفينهم؟؟
ميساء:ههههههههه
هنوف:هههههه..عديها يابنت وافهمي..
ساره:طيب طيب رايحه انا وش اللي مجيبني معكم..
ميساء:لا وين خلك تمزح هي..
هنوف:لا ما امزح هي تعرف..
ميساء تضرب هنوف على كتفها:اتركيها..
هنوف:بكيفك اجل ياميساء ماتبين الاحم احم..
ميساء:لا لا خلاص طلعت من الموضوع..
ساره فاطسه ضحك:هههههههههه..
وتكمل:رايحه اصلا شايفه بنات اعرفهم..
هنوف:ايه ياشين الصواريخ..
ساره تبتسم وتمشي عند بنات بعمرها..
هنوف:ايه وش فيك..لايكون جت حبيتيه؟؟
ميساء بسرعه:مين لا ايش احب شفيك انتي..
هنوف تكتم ضحكتها:ايه باين..مين بعد ..
وتكمل بخبث:نــاصر..
ميساء تعصب وتورد خدودها:هنووووف..
يدق جوالها وترد عليه بسرعه وبدون اهتمام..
ميساء بعصبيه:الووو..
:اهليــــن ثم اهليـــن..شفيك معصبه مني؟؟
ميساء ترتبك وتسكر الجوال وتنفسها يزيد وتطالع في الرقم..
شافته رقم (ناصر)..
هنوف بخبث:وتقولين ماتحبين بعد لا واضح..
ميساء بربكه وخجل:هنوف عاد نجي للجد..خلاص كافي..
هنوف:طيب وانا امزح يعني..
ايه اسمعي الاوراق والعقود وكل كل شي تمااام..وهذا طبعا على كلام خالد..
تقاطعهم ام حمد:بنات وش مقعدكم هنا امشوا عند المعازيم..
ميساء من غير ماتناظر:لا هنا احسن..
ام حمد بجديه:وين احسن محد يشوفكم ولاشي اشي الكل يسأل عنك..
وتكمل:ايه صحيح هذي مين ماعرفتيني عليها..
ميساء باستهزاء:لاعرفتك بس كنتي مشغوله..يمكن نسيتي..

ام حمد:آه..تذكرت اهلين هنوف صح؟؟


يتبع

هنوف وهي تسلم:ايه..
ام حمد:اهلين تشرفنا..
وتكمل:يالله امشي ميساء اقعدي مثل اختك يمكن يجيك نصيبك..
ميساء تضغط على يدها:طيب ان شاء الله..
هنوف تطالع بنظرات غريبه بين ام حمد وبنتها ميساء..
ام حمد طلعت للحريم بالصاله..
ميساء تنهدت..
هنوف:شفيك حاسه فيك شي مو طبيعي..
وتكمل بجديه:ولاتقولين هالمره بعد مافيني شي..!
شفت اللي يكفي انك فيك شي او صاير لك شي..
ميساء تلمع عيونها وتناظر لهنوف:تبين الحق..فيه اشيااااء ولاهي بشيء واحد..
هنوف:قولي انا هنا واسمع..
ميساء تنزل راسها:هنوف ماتعودت اشكي لاحد..
وتكمل بصوت واطي:الا لشخص واحــ...
هنوف باهتمام:ومين هو؟؟
ميساء تضيع الموضوع بابتسامه ناعمه:امم امشي خلينا نتسلى بس..
هنوف فهمت ان ميساء ماتبي تقول وجارتها وردت لها ابتسامتها..
ومشت وراها للصاله اللي فيها كل المعازيم..
لقوا ساره قاعده مع دلال ومجموعة بنات ومنيره مازالت في مكانها..
وكانت طول الوقت باين عليها الارتباك وتصنع العفويه..
وهم اكلوها بالتفحص سواء اخواته او امه كانوا يطالعون فيها..
من فوق لتحت ويتبادلون النظرات والاحاديث الجانبيه..
يعني باختصار كانت في موضع لاتحسد عليه..!
ميساء كانت هذي النظره اللي القتها لكل الحضور تقريبا..
وتمنت لو عيونها تتسلل..
وتشوف اللي ورى الجدران وتشوف هذاك الشخص اللي سمر..
رجولها في مكانهم..
تنهدت وحاولت تغوص معهم في احاديثهم..
وتنسى الحياة اللي عايشتها صار لها فتره مو قصيره..
هنوف كانت عين على ميساء وعين ع البنات كانت معهم كشكلا وترد عليهم..
بابتسامه وتراقب نظرات وتنهدات ميساء اللي تبين ضيقتها من شيء..
:ايه صحيح بغيت اقول لكم شي تدرون من شفت اليوم وانا جايه لكم..
الكل ما عدا ميساء:مين؟؟
ميساء مجرد التفتت من غير اهتمام..
:ياربيييه..شي ماراح تصدقوونه ابدا انا نفسي ماصدقت عيوني..
دلال:اخلصي قولي مين حرقتي اعصابنا..ههههه
:اقووول..
الكل:قووولي..
:ناصر الليث..وانا طالعه من السياره شفته بعيوني هو وابوه..
يالله تخيلوا بغى يغمى علي هذا المليونير وش مجيبه هنا..شكله تحفففه
يهبل يهبل ياناس..
ميساء باهتمام غريب:ناصر الليث؟؟
الكل التفت مستغرب لميساء وردة فعلها الغريبه عقب ماكانت ساكته وقاعده معهم مو مهتمه طول الجلسه..
هنوف الاسم رن في اذنها بس بعد ردة فعل ميساء وتذكرت ان هو نفس..
اسم الشخص اللي كان بالعقد حق ميساء..
هنوف تضرب ميساء:احم احم..
:ايه ناصر الليث ليش مو مصدقه؟؟وبعدين انتم عازمينه وماتدرون؟؟
ميساء انتبهت على نفسها وطالعت هنوف :اها..الا ادري بس كنت بتأكد من الاسم بس..
هنوف تضيع الموضوع:ايه صحيح دلال شخبارك شعلومك؟؟هاه مافيه شي بالطريق..
دلال:ههههه تو الناس..
ميساء نزلت عيونها بالارض حست راسها مصدع لابعد حد..




يتبع

والدنيا تدور فيها وحست انها دايخه خلاص معد فيها حيل رفعت عيونها بتعب..
وتجمع الافكار اللي بتهلكها والاشياء اللي تعقدت بشكل مرعب..
جت عينها بعين ام بندر(ام اللي بيخطب منيره)ابتسمت لها ام بندر ابتسامه غريبه..
واشرت عليها بثقه لبناتها وكلهم طالعوا وبدوا يبتسمون ويتكلمون بصوت واطي..
ميساء استغربت هذي الحركه ومافهمتها لكن ما هتمت لهم..
قعدت تطالع في البنات لكن بالها مو معهم ابدا..
.........
الشباب مجتمعين بجهه من المجلس ومستمتعين بالسوالف..
والشياب قاعدين يناقشون البورصه والشركات وامور السياسه..
كان ابو حمد معهم ومندمج يبي يستفيد..
ناصر كان قاعد بالنص بين الجهتين..
مره يبستم لسوالف الشباب ومره يتفرج على مناقشات الشياب..
ومره يتذكر البنت اللي شافها ع الكرسي او بالاصح ميساء..
اللي ما استوعب انه شافها قدامه ابتسم باستغراب مو مصدق اللي صار..
ومو مصدق ان هذي حقيقه..يقاطعه صوت صقر المرتفع:ياشبااااااب بس تكفون بموت من الضحك..
ويكمل:اقووول بطلع بشم هواا..
حمد بصوت واطي:بتشم هوا والا بتدق على اللي دقوا قبل شوي..هع هع
صقر يعدل شماغه:هيييه يارجال لايروح بالك بعيد احم احم..الاهل اصفط على جنب بس..
حمد:ههههههه..
ويكمل وهو يحاول يمسك ضحكته:خذ راحتك ولاتطول العشا بعد شوي..
الساعه 11..
صقر:فيه عشا تلقاني ناط قدامك..ماني مطول..هع
الشباب سمعوه:هههههه
صقر:ياليل الفشله احم..يالله طالع شويتين..
مشى برى المجلس وطلع راح لسيارته..
وطلع جواله ودق..
:لا مو لازم انا اشوف لك..دقيقه بس..مع اني ما اظن فيه احد الحين..
صقر وهو مندمج بالمكالمه سمع صوت كعب وخطوات خفيفه وراه..
لاشعوري لف وراه وشاف وحده حاطه شيله على شعرها وولابسه فوشي..
ظل متنح..
:سليم..سليم..يووه مو موجود هذا..
سليم:نعم مدام..
:خلاص تجهز فيه مشوار..وبعدين رد من اول مره..
سليم:سوري مدام..انا فيـ..
:خلاص..بتقول قصة حياتك
مشت ودخلت لداخل من غير ماتنتبه لصقر..
:الووووو..صقر وينك الووووو؟؟
صقر بعد فتره:هاه معك معك..
ويكمل في نفسه اكيد هذي ميساء يالبى لا لازم اخطبها مايصير كذا..
:متي بتجي؟؟
صقر:ايه اخطبها..
:ايش؟؟!
صقر انتبه لنفسه:هاه..لا ولاشي ع الـ12 ان شاء الله..
....
منيره:ايه موجود سليم وقلت له..
ام حمد: زين لانهم بيروحون بعد العشاء على طول..
منيره:يعني ما عندهم احد يوصلهم..

ام حمد:لا اللي جابهم مشغول ما يقدر..



يتبع

منيره:ايه والبوفيه جاهز اناديهم..
ام حمد:ايه بسرعه..
دخلوا المعازيم كلهم للصاله اللي فيها البوفيه والكل انشغل بالسوالف والاكل..
ميساء ومنيره ودلال وهنوف واختها ومن بنات عمهم سعود..
كانوا كلهم قاعدين على طاوله وحده وماخذتهم السوالف والضحك..
ميساء كانت بس تجامل بابتسامات..
وهنوف بين فتره وفتره تطالع فيها تبي تعرف شالقصه..
الساعه جت تقريبا ع الـ12
بدوا المعازيم يطلعون..
ولما جت ام بندر بتطلع..سلمت ع ام حمد والكل تقريبا..مرت من جنب ميساء..
ميساء وقفت لها مستغربه سلمت عليها واستغربت نظراتها وابتسامتها الغامضه..
هذا غير حركات واشارات بناتها..
منيره استغربت انها سلمت ع ميساء قبلها لكن سكتت..
مع ان الاقرب منيره وميساء كانت على طرف الطاوله بعيده شوي ..
بعدها سلمت بسرعه على منيره وبدون اهتمام كأنها مجامله يعني وطلعت برى..
هنوف:يالله ياقلبي ميسوو انا استأذن الحين..
ميساء:وين؟؟
هنوف:وشو بعد خلاص بنام عندكم..هههه
ميساء:يالله ما تهنيت معك..
هنوف:الجايات اكثر ان شاء الله..ايه ولنا حديث بالجامعه عن احم احم..
ميساء تضربها على كتفها:طيب طيب..
هنوف:هههه..
سلمت هي واختها وطلعوا..
فضى البيت وطلعوا المعازيم..ميساء تذكرت ناصر انه موجود هنا راحت بسرعه بتشوفه وبعده وقفت مكانها وحست بسخف هالحركه..
وحاولت تشيله من راسها وتمحي اللي صار معها اليوم كله..
دلال:يالله تعبت حيييييييييييل..
وتكمل بخبث:شايفين كل هذا عشاني.ههههه
ميساء:لاتحافين مو كله كلها فشخره..
منيره:ايه دلول وين بتنامين..؟
منيره كانت حاسه بشي غريب يقهرها بميساء خصوصا عقب الحركه..
اللي صارت من ام بندر..
دلال:هيه لاتحاولين بنام لحالي..
منيره:يوووه حسافه كنت ابيك معي..
يدق جوال دلال:احم احم المعزب..
منيره:هههههه..روحي له المسكين..
دلال تضربها على كتفها وتصعد فوق..
وترد عليه..
ظلوا ميساء ومنيره بالصاله ام حمد كانت منشغله مع الخدامات..
منيره في اشياء واجد في قلبها ودها تقولها من زمااان..
والحين بسبب الشعور الغريب اللي جاها ودها الحين تتكلم..
ميساء كانت مصدعه من كثر التفكير اللي هلكها..
ومنزله راسها وماسكته بيدينها..
منيره بتردد:ميــ..ـساء..
ميساء من غير ماتناظر:نعم..
منيره بثقه جتها فجأه:ماودك تقولين لي وش قصة الـ عقد..
ميساء نغزها قلبها وارتبكت وقالت في نفسها مو وقتها الحين ابدا..
باقي مانست ولا راح تنسى يالله..!
يقاطعهم حمد:السلااااام عليكم..
الكل:وعليكم السلام..
منيره ضغطت على يدينها..لانه قطع عليها..
منيره:يالله انا قايمه حاسه اني تعبانه..
حمد:سلامتك..نوم العوافي..
بعد ما راحت حمد:لهذي الدرجه انا ثقيل..هههه
ميساء:لاتقول لك تعبانه..

حمد:ايه هين..المهم بغيتك في موضوع..




يتبع

ميساء بدون اهتمام:ايش؟
حمد بتردد:شوفي انا احب الصراحه وانا اخوك وتعرفيني زين صح؟
ميساء:ايه وش عندك اختصر..
حمد:اعووذ بالله اعصابك..
ميساء:بتقوول؟
حمد:طيب طيب اكيد بقول..
ويكمل بتردد:اممم شوفي لاتفهميني غلط بس انا شسمه..ابيك تعطيني رقم..
احم احم..أ أ..
ميساء من غير ماتناظر وهي ماسكه راسها لانه يعورها حيل:قوول بسرعه..
اذا الرقم عندي اعطيك بس وشو..
حمد:ايه اكيد عندك بجوالك..هـو يعني انا ناوي اكلم امي بس يعني..
الرقم لـ...احم احم
ميساء:حمــــد..وبعدين..اقول لك..
حمد بصوت واطي:لهنوف..
وتكمل ميساء:خذه من جوالي..
وتقوم وهي ماسكه راسها صعدت فوق..
حمد ظل منصدم لفتره مو مستوعب..اللي سمعه قالت له خذه من جوالي..
كذا على طول من غير ولاشيء وهو متعب نفسه ويحاول يشرح لها ويبرر موقفه..
استغرب وبعد فتره:يالله سهالات دام بدياتها كذا..
ابتسم وكمل:عاد ليتني القاه والا اخاف مو كاتبه اسمها نفسه..
بعد فتره بسيطه وهو يدور بجوال ميساء بالارقام..
استغرب وجود اسم غريب بينهم مجرد حرف(ن)
عدا الرقم وبعده شاف هنوف شك يمكن مو نفسها لكن اخذه..
وسكر جوال ميساء هو داري انها ماسمعته زين والا مستحيل تعطيه..
لكن يبي يخلص بسرعه عشان ماتجيه وتعرف هي وش قالت قام وصعد لغرفته..
بعد مادخل الحمام واخذ له دش ع الطاير..
جا وتمدد على سريره بتعب..فتح الجوال وظل يتأمل رقمها جاب يدق لكن قال الوقت..
متأخر حس انه يسوي شي غلط يمكن البنت ماتفهمه او حتى تكرهه عقب المواقف اللي صارت له معها..
سكر الجوال وتنهد غمض جفونه وظل يفكر شلون يفتح الموضوع معها..
من غير ماتفهمه غلط..
/
فاقد الشي ما يعطيه..
/
فارس:ههههه ياحليلك وانت رايح لهم بعد بالله وش موديك..
ناصر:ابد ابوي اصر علي وانا ماوراي شغله ورحت..بس ماتوقعت بيتهم بسيط..
ع العموم ماكانت سهره مشينا الساعه 12 وبالنسبه لي كانت ممله..
ويكمل وهو يتنهد:الا شيء واحد عشقته من كل قلبي..
فارس وهو يتصفح الملفات بضجر:وان شاء الله وش هالشيء..
ناصر وهو سرحان:شيء قل سحر..
فارس:طيب وش هالسحر ..
ناصر:آه بس خلها ع ربك..
حتى مادقت امس مع انا متفقين..
فارس:ههههه..ياهووه بتقول والا شلون..
ناصر:ابد شيء ساحرني مالك فيه لكن مصيرك بتعرفه..
فارس:انت قعد تقط خيط وخيط وتلف وتدور ماتبي قل..
ناصر:ههههه..قلت لك مصيرك تعرفه..
فارس:ان شاء الله مصيري مصيري وش اسوي لك..
يا ابن خالوووو..
ناصر:هههههه..
فارس:ايه اقول لك امس يووه كان غثيث وحده نشبت لي..
رقمتها وليتني مارقمتها ع الساعه 11 يمكن دقت ولا عشرين مره..
وانا قايل لها اسمي مشعل..
ناصر:مشعل ههههه..وليش ان شاء الله تبي تبليه والا وش..
فارس:هههه..مدري اول اسم يطري علي هالرسمي مشعل..
يمكن لانه ناشب لي بكل شي..

وابشرك كل شوي تعوج فمها وتقول شعولتي ثم انا اتنح اقول من هذا..


يتبع